Kya aapne bhi abhi naya State Bank of India ka Debit/ATM Card issue karwaya hai? ya phir aapko abhi State Bank of India ki taraf se naya Debit/ATM Card mila? To aapko pata hoga ki ab zyadatar bank Debit/ATM Card ke sath uska PIN nahi dete hain. Banks aisa isliye karte hain taaki Debit/ATM ki suraksha bani rahe, aur customer ke sath PIN ko lekar kisi tarah ka koi fraud na ho. Baharhaal bankon ki bhi kuch majboori hai, jiski wajah se bank ab aapko Debit/ATM Card ke sath PIN nahi dete hain.

To jab aapko bina PIN ke Debit/ATM Card milta hai to aap bhi sochte hain ki ab isko kaise istemaal kiya jaaye?, iska PIN kaise generate kiya jaaye?, PIN generate karne ke liye kya karna hoga ya kahan jaana hoga? is tarah ke kai sawal dimaagh mein aa jaate hain. Haalanki Debit/ATM Card ke sath humen user guide ya user manual aur ek letter milta hai. User guide mein Debit/ATM Card se sambandhit jaankariyan di gai hoti hain, jaise ki Debit/ATM Card ko kahan kaise istemaal karna hai aur bhi bahut si anya jaankariyan di hoti hain. Letter mein humen bataya gya hota hai ki aap apne Debit/ATM Card ka PIN kaise aur kin-kin tareekon se generate kar sakte hain.

Ab agar State Bank of India ke Debit Card ki baat ki jaaye to State Bank of India ke Debit Card ka PIN aap 4 tareekon (methods) se generate kar sakte hain:

  • (1) ATM ke zariye 
  • (2) SMS ke zariye 
  • (3) Internet Banking ke zariye 
  • (4) IVRS yaani Phone Call ke zariye 

Ek tarah se Internet Banking ko chhodkar aapko sabhi methods ke liye State Bank of India ke ATM par jaana hi hoga. Agar aap IVRS yaani Call ya SMS dwara apne SBI ke Debit/ATM Card ka PIN generate karte hain to aapko ek OTP bheja jaata hai jo ki 2 din ke liye valid hota hai aur is OTP ko lekar aapko SBI ke ATM par jaana hota hai aur is OTP ka istemaal karke aapko apne Debit/ATM Card ka PIN generate karna hota hai. To ek tarah se in sabhitareekon mein Internet Banking hi ek aisa tareeka hai jiske liye aapko kahin jaane ki zaroorat nahi padegi, aur aap ghar baithe hi apne SBI ke Debit/ATM Card ka PIN generate kar leneg.
To agar aapke paas bhi SBI ka naya Debit/ATM Card hai aur aap uske liye PIN generate karna chahte hain to yeh article aapke liye kaafi upyogi aur laabhdayak sabit hoga. Kyunki yahan hum aapko batane wale hain ki kaise aap bina SBI ke ATM par visit kiye apne Debit/ATM Card ka PIN generate kar sakte hain. SBI ke Debit/ATM Card ka PIN online generate karne ke liye aapke paas SBI ki Internet Banking ka Username (ID) aur Password moujood hona chahiye. SBI ki Internet Banking ka Username (ID) aur Password paane ke liye aapko SBI ki Internet Banking seva ke liye registration karna hota hai. Lekin agar aapko pehle se hi branch ki taraf se Internet Banking ka Username (ID) aur Password mila hai to aapko bas usko Activate hi karna hota hai

Yeh bhi padhen:
To agar aap SBI ki Internet Banking sevaon ke liye registration kar chuke hain ya agar aap pehle se hi SBI ki Internet Banking ka istemaal kar rahe hain to aapko humaare dwara bataaye gaye in simple steps ko follow karna hogaaur aap apne SBI ke Debit/ATM Card ka PIN ghar baithe hi online generate kar sakte hain.

Step 1: Sabse pehle aapko SBI ki Internet Banking ki official website (onlinesbi) par visit karna hoga. SBI ki Internet Banking ki website par visit karne ke baad, aapko Internet Banking ke liye Login hona hoga aur iske liye bas aapko Login par click karna hai. Yahan aapko ek baat dhyan deni hogi ki hum keval 'Personal Banking' ki baat kar rahe hain, Corporate Banking ki baat nahi kar rahe hain



Login par click karne ke baad aap se aapki Internet Banking ka Username aur Passowrd poocha jayega, to aapko yahan par apne Internet Banking ka Username aur Password enter kar dena hoga.





Step 2:  Login hone ke baad aapko kuch is tarah ka interface dekhne ko milega, yahan aapko 'e-Services' ka ek menu dekhne ko milega, to aapko isi par click karna hoga. Jaise hi aap 'e-Services' par click karte hain to ek drop-down menu khulega






Is drop-down menu mein aapko 'ATM Card Services' ka option milega aur aapko isi option par click karna hai.





Step 3: 'ATM Card Services' par click karne ke baad ek naya page khulega, jiska interface kuch is tarah ka hoga. Yahan aapko 'ATM Pin Generation' ka option dikhai dega, aur aapko isi par click karna hoga.








Step 4: 'ATM Card Services' par click karne ke baad phir ek doosra page open hoga, aur yahan aapko ATM Pin Generation ke liye 2 option nazar aayenge: Using One Time Password (OTP) aur Using Profile Password. To jo option aapko aasan lage uspar click kar dijiye. Lekin yahan hum OTP ka istemaal karenge to agar aap bhi OTP ka istemaal karna chahen to kar sakte hain, to uske liye 'Using One Time Password' par check mark laga dijiye.





'Using One Time Password' par click karne par aapke mobile phone par ek OTP SMS dwara bheja jayega, aur us OTP ko aapko yahan enter karna hoga. OTP daalne ke baad aapko 'Submit' button par click karna hoga.





Step 6: 'Submit'  par click karne ke baad ek naya page khulega aur yahan aapko apna Debit Account Select karna hai, yaani ki aap jis Account ke Debit Card ke liye PIN generate karnachahte hain wo aapko yahan select karna hoga. Agar SBI mein aapka ek hi Account hai to phir wo pehle se hi selected hoga. Account select karne ke baad aapko 'Continue' par click karna hoga.





Step 7: 'Continue' par click karne ke baad phir se ek naya page khulega aur humen yahan us Debit Card ko select karna hoga jiska PIN hum change ya generate karna chahte hain. Debit Card select karne ke baad humen 'Submit' par click karna hoga.





Step 8: 'Submit' par click karne ke baad ab aapko apne Debit Card ka PIN generate karna hoga. Yahan aap se aapke Debit Card ke liye shuru ke 2 ankon (First 2 Digit) ka PIN maanga jaa raha hai. To aap apni marzi se apne Debit Card ke liye shuruati 2 ankon ka PIN yahan enter kar dijiye. Shuru ke 2 ankon ka PIN daalne ke baad aapko 'Submit' par click karna hoga.



Step 9: Debit Card ke Shuru ke 2 ankon (First 2 Digits) ka PIN daalkar Submit karne par aapko SMS dwara baaki ke 2 ankon ka PIN bhej diya jayega, is tarah se yeh poore 4 ankon (Digits) ka PIN ho jayega. Shuru ke 2 ankon (digits) ka PIN hum apni marzi se jo chaahe rakh sakte hain aur aakhiri ke 2 ankon (digits) ka PIN humen bank system dwara SMS se bhej diya jaata hai aur is tarah yeh 4 ankon (digits) ka PIN ho jaata hai. Ab yeh 4 ankon (digits) ka PIN aapko yahan enter karna hota hai. Aapne jo 2 ankon (digits) ka PIN banaya hai wo aur jo aapko SMS dwara 2 ankon (digits) ka PIN bheja gya wo, aapko yahan daalna hoga. 4 ankon (digits) ka PIN daalne ke baad 'Submit' par click karna hota hai aur aapke Debit/ATM Card ka PIN successfully generate ho jaata hai.





To is tarah se hum SBI ki Internet Banking se apne Debit/ATM Card ka PIN ghar baithe hi online generate kar lete hain, aur humen SBI ke ATM par jaane ki zaroorat bhi nahi padti hai. Ummid hai ki humare dwara di gai jaankari aapke liye kaafi helpful (sahayak) sabit hogi. Agar phir bhi aapko AMT PIN generate karne mein koi dikkat aati hai to aap is post ke neeche comment karke humen apni dikkat ke baare mein bata sakte hain, hum aapki sahayata karne ki poori koshish karenge.